Выстава 2019
Гісторыі, якія маюць значэнне:
«СУСВЕТНАЕ ПРЭС-ФОТА – 2019»
у Гродне
John Moore | Getty Images
Гісторыі, якія маюць значэнне:
«СУСВЕТНАЕ ПРЭС-ФОТА – 2019» у Гродне
Міжнародная выстава World Press Photo 2019, на якой можна будзе пабачыць найлепшыя сусветныя прэс-фатаграфіі 2018 года, прыедзе неўзабаве ў Беларусь. Культурніцка-адукацыйны цэнтр ЦЭХ прывозіць выставу ўжо чацвёрты раз. Сёлета «Прэс-фота» — сусветна вядомы праект — ужо другі раз пабачаць у Гродне.

Выстава паказвае вынікі штогадовага конкурсу «Сусветнае прэс-фота», які сёлета ладзіцца 62-гі раз. Конкурс адзначае прафесійных фатографаў за найлепшыя кадры – асобныя здымкі або серыі, – зробленыя імі на патрэбу візуальнай журналістыкі ў папярэднім годзе.
8–29 жніўня 2019
Гродна
Цэнтр гарадскога жыцця (вул. Кірава, 3).
12–20 штодня.
Уваход вольны
Сёлета 4738 фатографаў са 129 краінаў падалі на конкурс 78 801 фатаграфію. Візуальныя гісторыі ацэньваюцца паводле наступнага крытэру – дакладнае, сумленнае і пераканаўчае адлюстраванне нашага свету. Працы мусяць адпавядаць нормам этыкі, а фота пераможцаў праходзяць строгую праверку на праўдзівасць. Гэта гарантуе дакументальную дакладнасць сцэнаў, сведкам якіх зрабіўся фатограф.

У журы конкурсу ўваходзяць прызнаныя прафесіяналы фотажурналістыкі. Склад журы мяняецца кожны год. Журы не залежыць ад фундацыі «Сусветнае прэс-фота», і выключна журы вызначае пераможныя фота і фотагісторыі, што маюць значэнне.

Фундацыя «Сусветнае прэс-фота» верыць у сілу выявы і важнасць дэманстрацыі высакаякасных візуальных гісторыяў.

Усё пачала ў 1955 годзе група галандскіх фатографаў, арганізаваўшы міжнародны конкурс («Сусветнае прэс-фота»), каб паказаць свае працы аўдыторыі па ўсёй планеце. З таго часу конкурс развіўся ў самае прэстыжнае на свеце спаборніцтва фатографаў, а нашая місія пашырылася. Штогод нашая выстава экспануецца больш чым у 100 гарадах 45 краінаў. Як і наш штогадовы фестываль у Амстэрдаме, выстава прэзентуе гісторыі, што змушаюць людзей спыніцца, адчуць, задумацца і пачаць дзейнічаць. Наш конкурс ушаноўвае найлепшае ў журналістыцы і лічбавым сторытэлінгу.

Нашая мэта – далучыць свет да гісторыяў, што маюць значэнне.
Ужо 60 гадоў фундацыя «Сусветнае прэс-фота» працуе ў сваёй сядзібе ў Амстэрдаме як незалежная некамерцыйная арганізацыя. Тым часам свет няспынна змяняецца, і новыя распрацоўкі ў медыях ды тэхналогіях трансфармавалі журналістыку і сторытэлінг. Нашая місія пашырылася, яе найважнейшы момант – весці візуальных журналістаў, сторытэлераў ды іх гледачоў праз увесь свет, па яго поўным выклікаў, неверагодным ландшафце.

Мы падтрымліваем умовы, якія робяць магчымымі візуальную журналістыку і сторытэлінг, у тым ліку свабоду выказвання, свабоду даследавання і свабоду прэсы. Ніколі яшчэ патрэба ў выявах і гісторыях, вартых даверу, не была такой адчувальнай, і высакаякасныя рэпартажы на гэтай выставе ды нашых медыйных каналах даюць вам важныя веды пра наш свет. Часам гэта прыгожыя выявы, а часам неабходна паказаць цяжкія гісторыі, але ўсе яны дакладныя і маюць значэнне.

У 2019 годзе выставу «Сусветнае прэс-фота» ўжо шосты раз прымае Беларусь (апошнія чатыры гады афіцыйным партнёрам праекту выступае культурніцка-адукацыйны цэнтр ЦЭХ). Экспазіцыя арганізаваная ў партнёрстве з Цэнтрам гарадскога жыцця (Гродна) пры фінансавай падтрымцы амбасады Каралеўства Нідэрландаў у Варшаве.

Экспазіцыя будзе даступная з 8 да 29 жніўня 2019 года па адрасе: Цэнтр гарадскога жыцця, вул. Кірава, 3, 12:00–20:00 штодня, уваход вольны.
Партнёры
Беларуская выстава «Сусветнага прэс-фота — 2019» адбудзецца дзякуючы падтрымцы амбасады Каралеўства Нідэрландаў у Польшчы